ياطفلة ساعفي

ياطفلة ساعفي بشوية يهديك...ثقلي خطواتك وشوفي ليا
عندي كلام حبي نقولوليك...أفهمي معناه وردي عليا
نحي نواضرك نخزر عينيك...ونحكيلك من قلبي هدي لقصية
حالف مانزيد حتى كلمة عليك...كلش صار بين صبحة وعشية
ماعرفتش صح أنا نبغيك...والا غير نتعب في عينيا
هدي مدة وانا نتبع فيك...مادريت حالي واش اللي بيا
ساعة نقول نروح لماليك...واساعة نقول هدي ماهيش ليا
ساعة تبانيلي كيما ديك وديك...وساعة نقول لالا هدي هيا
عقلي ماطاوعنيش نرتبط بيك...وقلبي فالليل يبات يعدم فيا
كيفاش ندير يرحم والديك...الحل وين راه ازربي ليا
بالا ننساك خير ليا وليك...ونهبط الريدوات على عينيا
كي تفوتي عليا مانتوله ليك...وتبرد ناري من جيهتك شويا
خلاطة لهوى اللي يجي يديك..الصباح مع واحد ولاخر مع لعشيا
اللي عندو المال والشكارة يشريك...ولصحاب السيارات عينك ملويا
خافي من ربي بالقدرة يعميك...يفنى زينك وتطيحي في كاش بليا
وتندمي على اللي درتي بيديك...في ركنة من الدار تولي مرمية
اللي كنت معاهم ماسالو فيك...حتى من البورطابل راكي ممحيا
فكري في غدوة ربي يهديك... كاين اللي كبدو عليك مشويا
لا تخلي المظاهر الكادبة تغويك...ماتخلي واحد يربح فيك مزية
عامر شيتور قال كلام عليك...عارفك عاقلة تفهمي يابسكرية
مانيش قاصد ندلك ونطيح بيك...أنا ناصحك برك في هد لوصية
حابك تعرفك راسك من رجليك...وتخممي مع راسك ياسر ولا شوية

كلمات: اعمر شيتور سيدي خالد